Reglanan i kondishon pa partisipá na Reto Eskolar Konsiente 2008
di
Fundashon Konsiente

Partisipashon ta únikamente i solamente pa habitantenan legal na Kòrsou, Antia Ulandes.

Aplikando pa partisipá bo ta bai di akuerdo pa duna un man boluntariamente den proyektonan di  Fundashon Konsiente den kaso ku abo keda skohé komo un di e hóbennan ku ta haña su aña eskolar 2008/2009 pagá òf un lèptòp. E proyektonan aki ta bou di guia di Fundashon Konsiente i ta enserá:
1. Hasi investigashon riba Internèt i den biblioteka pa haña datonan konsiente i/òf
2. Partisipá na enkuestanan konsiente i/òf
3. Partisipá den aktividatnan di Fundashon Konsiente

Partisipashon:
Reto Eskolar Konsiente 2008 ta abrí únikamente i solamente pa tur hóben di nashonalidat ulandes òf ku ta bibando legalmente na Kòrsou, Antia Ulandes i ku ta entre 15 pa 25 aña bishitando HAVO/VWO, IFE òf UNA. Mayor òf representantenan legal di e studiante ku partisipá mester ta dispuesto pa komprobá ku nan entrada no ta yega pa kubri sea un aña eskolar òf pa kumpra un lèptòp. Tambe mayornan i representante legal di e studiantenan ku kai den konsiderashon mester ta dispuesto pa kontestá preguntanan ku Fundashon Konsiente por tin relashoná ku nan situashon general. Solamente un yu den un famia lo por bin na remarke pa haña sea su aña eskolar pagá òf pa haña un lèptòp.

Realisashon
Fundashon Konsiente ta atendé delaster un aplikashon ku konfidensialidat i lo no kompartí bou di niun sirkunstansha niun dato ni informashon ku e aplikante presentá. Tampoko lo publiká ni hasi niun forma di publisidat ku e studiantenan ku keda eskohé pa haña nan aña eskolar 2008/2009 pagá òf pa haña un lèptòp.
Ta firma si ku e mayor/representantenan legal i/òf e studiante ku e ta disponibel teniendo kuenta ku su tareanan di skol, pa partisipá den proyektonan di Fundashon Konsiente.
Fundashon Konsiente mes ta paga e gastunan eskolar i e lèptòp i no ta duna ni e mayor i representantenan legal ni e studiante plaka kèsh den su man.

Kriteria
Ta husga si en bèrdat un studiante mester di su aña eskolar 2008/2009 pagá òf ku e mester di un lèptòp segun
1. Situashon finansiero di su mayor òf representantenan legal;
2. Motivashon di e studiante pa bai skol;
3. Boluntat pa ke kontribuí na Kòrsou.

Durashon di aplikashon
Por apliká pa Fundashon Konsiente paga bo aña eskolar 2008/2009 òf dunabu un lèptòp pa usa pa bo aktividatnan di skol solamente den e siman di djaluna 21 di yüli 2008 te ku 12'or anochi djadumingu 27 di yüli 2008. Ta tuma kontakto ku mayornan i representantenan legal di e studiante mas lihé posibel pa por informá e hóbennan ku ta gana nan aña eskolar pagá òf un lèptòp dia 1 di ougùstùs 2008 ku ta nan a keda eskohé.
Tur partisipante lo haña via e-mail un kontesta sea positivo òf negativo di Fundashon Konsiente.

Disputa
Selekshon di ken ta gana nan aña eskolar pagá òf un lèptòp ta den man di Fundashon Konsiente i su sostenedónan finansiero. No ta posibel pa bou di niun sirkunstansha kuestioná selekshon di e hóbennan ku ta keda eskohé.
No por pone Fundashon Konsiente responsabel bou di niun kondishon si un hóben su aña eskolar no por keda pagá òf si un hóben no tin un lèptòp.
Fundashon Konsiente tampoko ta responsabel pa niun fayo ku por ta e.o. sea elektróniko, tékniko, digital, ku kòmpiuter, víres, mal informashon ku no ta sali di Fundashon Konsiente, ku e-mail ku no yega na tempu, den publisidat, riba página web, ku por sosodé ku aplikashon òf komunikashon relashoná ku Reto Eskolar Konsiente 2008.
Tampoko Fundashon Konsiente no ta responsabel pa niun daño òf situashon ku por resultá pasobra e studiante a haña su aña eskolar 2008/2009 pagá òf a haña un lèptòp.

Adishonal
Direktiva di Fundashon Konsiente ta úniko inisiadó i organisadó di e proyekto aki i no a outorisá niun otro hende ni instansha pa representá Fundashon Konsiente.
Tur informashon ta disponibel riba www.konsiente.com i por komuniká ku Fundashon Konsiente na e-mail konsiente@konsiente.com.

Kòrsou, 20 di yüli 2008