Reto eskolar konsiente 2008

Punto di salida:
Bo ta un hóben di 15 pa 25 aña ku ta siña bon na skol.
Bo ta motivá pa den futuro bo tambe nifiká algu pa bo pais.
Bo sa ku bo ta siñando pa den futuro bo por traha i kuida bo famia.
Bo reto ta pa kaba skol maske situashon finansiero di bo mayor(nan) no ta fásil.
I bo sa ku for di awor aki bo por duna un man pa yuda konsientisá hendenan na Kòrsou.

Si bo ta un hóben ku ke yuda Kòrsou anto nos ta invitábo pa apliká pa wak si abo tambe por haña bo aña eskolar 2008/2009 kompletamente pagá òf ku bo por haña un lèptòp den e Reto Eskolar Konsiente 2008.

Partisipashon
Despues di yena e formulario di partisipashon i si abo keda skohé, bo por ta un di e hóbennan konsiente ku ta gana su aña eskolar 2008/2009 kompletamente pagá. Òf bo por kualifiká pa haña un lèptòp.
Loke Fundashon Konsiente ta spera di bo na momentu ku bo kualifiká pa haña bo aña eskolar pagá òf un lèptòp, ku bo ta duna un man komo boluntario den proyektonan di Fundashon Konsiente.
E proyektonan aki ta enserá:
1. Hasi investigashon riba Internèt i den biblioteka pa haña datonan konsiente i/òf
2. Partisipá na enkuestanan konsiente i/òf
3. Partisipá den aktividatnan di Fundashon Konsiente

Fundashon Konsiente ta reta abo pa partisipá loke ta duna abo tambe oportunidat pa
1. duna un kontribushon na komunidat di Kòrsou,
2. traha riba bo ret di kontakto ku sigur sigur ta importante pa kualke karera ku bo skohe den futuro,
3. konosé hopi hende ku por yudabu ku preparashon pa bo karera,
4. dunabu oportunidat pa haña eksperensia den proyektonan organisá i kon traha riba proyektonan i
5. bo ta prepará bo mes pa abo tambe ta un siudadano konsiente.

Reta bo mes i garantisá ku bo por tin un bon futuro!

Lesa aki regla i kondishon pa partisipá na Reto Eskolar Konsiente 2008

Si bo tin kualke pregunta tuma kontakto ku Direktiva di Fundashon Konsiente na konsiente@konsiente.com.