14 Komunikado di Fundashon Konsiente - 16 di sèptèmber 2009
Pa Fundashon Konsiente
Tarea di prensa mas influyente ku nunka
Willemstad – Pará dilanti di un kambio estatal, menasa di impakto di krísis mundial riba kua nos no tin kòntròl i falta di konfiansa den loke nos por. Esei ta tres punto di atenshon ku pa Fundashon konsiente mester ta enfoke tambe di un prensa responsabel den nos pais.
Fundashon Konsiente pa e motibu ei ta kere ku tur periodista ku ta konsiente di su influensia den nos komunidat mester pone atenshon riba e responsabilidat ku e tin.
Den kuadro di esfuerso pa motivá esnan ku ke pa nan ta konsiente di diferente aspekto ku ta hasi nos huntu un komunidat lo ta ideal tambe si logra ku mas tantu hende den prensa posibel komprondé kon nan ta influensia komunidat. Banda di esaki mester tin e motivashon pa esnan ku ta traha den prensa pa nan tene nan mes na altura di loke ta pasando i ku e konosementu ku nan tin nan por hasi nan trabou mihó posibel loke riba su turno atrobe ta bai resultá den e kontribushon real ku prensa mester duna na nos komunidat.
Dia di Prensa por ta e reflekshon korekto pa wak kon bini maske ku tin hopi periodista serio ku bon intenshon tòg te ainda no tin un rèspèt pa prensa.
E simpel hecho ku tin reakshonnan negativo regularmente riba prensa i e produkto final di prensa ku ta keda presentá den medionan di komunikashon, ta rason pa prekupá pa e influensia ku prensa tin òf no tin.
Siendo un di e pilanan di importansha den nos komunidat ku mester informá, eduká, forma, guia i sostené siudadanonan mester tin tambe e noshon di parti di prensa i di parti di e pueblo ku ta skucha, mira i lesa e periodista ku mester hasi mas uso i benefisiá mas di presensia di prensa den nos komunidat.
Prinsipalmente prensa mes mester tuma e responsabilidat pa su influensia ta di tal forma ku nos ta konstruí progresivamente. Laga responsabilidat di ki direkshon ta bai ku kualke influensia no por konta sigur no pará na inisio di un pais nobo.
Fundashon Konsiente ta spera ku kada ken responsabel den prensa i spesífikamente e periodista ta tuma su trabou na serio i ku ta tene kuenta debidamente ku e balornan nesesario pa komo medio influyente yuda na konstruí un mihó Kòrsou.
Fundashon Konsiente ta apoyá tur ku trahando den prensa ta realisá ki nan responsabilidat ta i ku nan ke yuda empoderá siudadanonan durante di proseso pa yega na e kambio estatal nobo, guia i informá debidamente di menasa di impakto di krísis mundial riba nos i yuda nos komunidat di tin konfiansa den loke nos por i mester bai hasi pa yega na un mihó pais posibel.
Por haña mas informashon di Fundashon Konsiente riba www.konsiente.com.
13 Komunikado di prensa - Kòrsou, 19 di mei 2009
Segun Fundashon Konsiente:
Para ketu na ehèmpel ku ta dunando mucha
Willemstad - Tur hende konsiente tin rason di ta prekupá pa e Kòrsou ku nos ta kreando huntu na e momentu aki. I tur hende konsiente mester akseptá su kontribushon pa hiba Kòrsou dilanti. Esei ta opinion di Fundashon Konsiente.
Fundashon Konsiente despues di a opservá desaroyonan resien notabel den nos komunidat ta sigur ku kada siudadano ku ta biba aki i ku ke tin un bida di kalidat, mester tuma akshon pa Kòrsou ta bon. E akshon aki por ta posibel den tur nivel, pa kada grupo i segun posibilidat di esun ku ke.
Un akshon ku mester tuma sin mas ta di duna atenshon na un manera mas abri i konstruktivo na sosialisashon di nos hóbennan. E hóbennan ta esnan ku awe ta siñando di adultonan kon mester komportá i kon mester atendé ku bida. Lamentablemente ku nos hóbennan ta haña nan ku hendenan grandi ku mester sa mihó ku no ta mihó dunadó di ehèmpel di kon mester komportá den bida. Sigur ora ta trata di lidernan di nos komunidat mester ta un prekupashon ku nan no ta karga responsabilidat pa yuda mucha forma su mes pa e ta un hende ku Kòrsou tin algu n’e den futuro. I esaki ta un lastimá pasobra ta masha difísil pa un hende ku ta mal programá kita loke a siñ’é pa despues e bai siña atrobe un komportashon ku ta bon pa Kòrsou.
Por opservá kon konstantemente ta kritiká nos hóbennan ku nan no ta komportá bon, ku nan ta riba mal kaminda i ku nan mester hasi loke hende grandi ta kere ku ta bon. Sinembargo tin biaha ta netamente esnan ku ta kritiká ta lubidá ku e hóbennan ta wak nan i ta imitá nan komportashon ku e resultado no deseá.
Pa Fundashon Konsiente ta importante pa tur hende para ketu i wak den ki futuro nos ta invertiendo. Ki sorto di Kòrsou nos ke. I ku ken nos ke sigui biba positivamente den Kòrsou.
Riba e wèpsait www.konsiente.com a pone un enkuesta nobo ku ta atendé netamente e prekupashon aki. Bo kontesta por yuda komo guia pa indiká grado di konsiensia den nos komunidat i ken tin di tuma responsabilidat.
Por komuniká ku Fundashon Konsiente na konsiente@konsiente.com.
12 Komunikado di prensa - Kòrsou, 8 di mei 2009
Maria Liberia Peters i Elmer Wilsoe den final ‘Opinion Konsiente’
Willemstad – Fundashon Konsiente ta finalisá djasabra awor e promé serie di ‘Opinion Konsiente’ ku un interesante kòmbersashon entre èks Promé Minister di Antia Maria Liberia Peters i èks gezaghèber di Kòrsou drs. Elmer ‘Kadè’ Wilsoe. Tabata intenshon pa èks promé minister Mr. Miguel Pourier tambe tabata presente den e último ‘Opinion Konsiente’ pero dor ku e ta den estranheria no tabata posibel pa e tambe partisipá den e programa di djasabra awor.
‘Opinion Konsiente’ a kuminsá kuater siman pasá komo un kontribushon di Fundashon Konsiente pa duna informashon ophetivo relashoná ku e referèndem di dia 15 di mei próksimo. Aksènt espesialmente ta i tabata pa konsientisá nos komunidat pa loke ta nos futuro struktura estatal.
Den e por lo pronto último programa ‘Opinion Konsiente’ por sigui pues e kòmbersashon entre èks promé minister di Antia Maria Liberia Peters i èks gezaghèber di Kòrsou drs. Elmer ‘Kadè’ Wilsoe miéntras ku esnan ku ta entrevistá ta vise presidente di Fundashon Konsiente Gabriël ‘Boy’ Magdalena i presidente Reyna Joe.
Fundashon Konsiente durante di e transmishonnan a pone premionan interesante disponibel pa esun ku partisipá i kontestá e pregunta ku ta keda lansá mei mei di kada transmishon di ‘Opinion Konsiente’. E pregunta di siman pasá tabata: Di kuantu gabinete antiano, gabinete de Jongh Elhage ta? Den e programa di djasabra awor ta anunsiá e tres ganadónan kualnan ta gana un bòn di f. 100,-- pa laba paña na Laundromat Easy Wash, un bòn di f. 100,-- pa kumpra na un supermerkado i un masashi na Milly’s Centre. Por haña e preguntanan, nan kontesta i e ganadónan riba www.konsiente.com.
‘Opinion Konsiente’ ta pasa djasabra atardi 6’or simultáneamente na Telecuraçao i na TV11. Fundashon Konsiente ta gradisí tur televidente pa nan reakshon i ta invitá un i tur pa wak ‘Opinion Konsiente’ riba djasabra 6’or atardi i laga sa na konsiente@konsiente.com kiko ta bo ‘Opinion Konsiente’. Por haña mas informashon riba www.konsiente.com.
11 Komunikado di prensa - 24 di aprel 2009
Opinion Konsiente ku èks Promé Minister Miguel Pourier
Willemstad – Fundashon Konsiente ta kontinuá djasabra dia 25 di aprel 2009 ku ‘Opinion Konsiente’ ku ta e di dos transmishon di 4 programa informativo relashoná ku referèndem di dia 15 di mei próksimo. Di e forma aki Fundashon Konsiente tambe ta kontribuí ku konsientisashon di nos komunidat relashoná ku nos futuro struktura estatal.
Den e programa ‘Opinion Konsiente’ ku a pasa djasabra último tabatin presentashon di èks Promé Minister di Antia Maria Liberia Peters, kende a trese dilanti diferente eksperensia ku e tabatin durante di su tres periodonan komo promé mandatario antiano.
Djasabra próksimo lo tin un kòmbersashon interesante atrobe ku èks Promé Minister mr. Miguel Pourier kende ta keda entrevistá pa miembro di direktiva di Fundashon Konsiente Ing. Edwin Constansia i presidente Reyna Joe.
Fundashon Konsiente durante di e transmishonnan tin premionan interesante disponibel pa esun ku partisipá i kontestá e pregunta ku ta keda lansá mei mei di ‘Opinion Konsiente’.
E pregunta di siman pasa tabata: ‘Kiko ta St. Eustatius su opinion relashoná ku e kambionan ku ta preparando den nos struktura estatal’.
Den e programa di djasabra awor ta anunsiá e tres ganadónan kualnan ta gana un bòn di
f. 100,-- pa laba paña na Laundromat Easy Wash, un bòn di f. 100,-- pa kumpra na un supermerkado i un masashi na Milly’s Centre.
Lo pone detaye di e pregunta i ganadónan riba www.konsiente.com.
Próksimo transmishonnan di ‘Opinion Konsiente’ ta dianan 25 di aprel i 2 i 9 di mei 2009, 6’or atardi simultáneamente na tantu Telecuraçao komo na TV11.
Fundashon Konsiente ta invitá un i tur pa wak ‘Opinion Konsiente’ riba djasabra 6’or atardi i laga sa na konsiente@konsiente.com kiko ta bo ‘Opinion Konsiente’. Por haña mas informashon riba www.konsiente.com.
10 Komunikado di prensa - 16 di aprel 2009
Fundashon Konsiente ta presentá ‘Opinion Konsiente’
Willemstad – Djasabra dia 18 di aprel 2009 ta keda transmití e promé programa ‘Opinion Konsiente’ ku ta forma parti di 4 programa informativo produsí pa Fundashon Konsiente.
E fundashon a skohe pa bini ku un kontribushon den kuadro di konsientisashon di nos komunidat relashoná ku nos futuro struktura estatal.
A skohe pa aserká personanan ku tabatin un posishon di liderazgo den nos komunidat antiano i tene un programa informativo ku e personanan aki. Den e promé programa ku ta djasabra 18 di aprel, miembronan di direktiva di Fundashon Konsiente, Romualdo Alfonso i Reyna Joe lo papia ku eks promé Minister di Antia Maria Liberia Peters.
Meta di Fundashon Konsiente, ku ta e fundashon ku a keda lantá na mei aña pasá, ta pa duna informashon nesesario na komunidat; konsientisá di desaroyonan ku ta tumando lugá di kua nos por hasi algu n’e i kual nos no por hasi nada n’e i konsientisá siudadanonan pa nan mes karga responsabilidat pa yega na un mihó Kòrsou.
Fundashon Konsiente ta realisando su meta dor di organisá diferente proyekto di konsientisashon na kua komunidat por partisipá. Ku ‘Opinion Konsiente’, Fundashon Konsiente ta sigui buska informashon pa kompartí ku komunidat. Ta p’esei e lema: ‘mas konsiente un hende ta, mas mihó desishon e por tuma, pa su mes, i pa henter komunidat’.
‘Opinion Konsiente’ ta un programa informativo den kuadro di preparashon i formamentu di opinion pa referèndem di 15 di mei 2009 i ta keda transmití dianan 18 i 25 di aprel i 2 i 9 di mei 2009, 6’or atardi simultáneamente na tantu Telecuraçao komo TV11.
Durante di Opinion Konsiente lo tin tambe un pregunta pa televidente ku ta duna oportunidat na e televidente ku reakshoná pa gana un di e tres premionan semanal hopi interesante.
Fundashon Konsiente ta invitá un i tur pa wak ‘Opinion Konsiente’ entrante djasabra awor i laga sa na konsiente@konsiente.com kiko ta bo ‘Opinion Konsiente’. Por haña mas informashon riba www.konsiente.com.
Komunikado 9 - 29 di desèmber 2008
Segun Fundashon Konsiente
Tur hende ta responsabel pa un bon 2009
Willemstad - Ni maske di desaroyo tuma lugá， ni maske kuantu kambio bini ta keda un realidat ku kada hende individualmente mester yuda kurpa pa asina ei e por benefisiá di e tantísimo kosnan bon ku tin den nos komunidat. Esaki ta opinion di Fundashon Konsiente. Pará na un otro fin di aña Fundashon Konsiente ta wak bèk riba un aña kaminda por a tende opinion di siudadanonan ku por opiná riba e hopi kosnan bon i tambe e hopi kosnan malu ku tabatin. Remarkabel ta ku den muchu hopi kaso ta parse ku muchu hende ke pone responsabilidat pa kosnan ku ta pasa den man di otro hende. Na mes momentu tur hende mester komprondé ku den tur kaso tabatin chèns pa tur hende mes disidí na ki banda e ta bai i kiko e ta skohe pe.
Pa Fundashon Konsiente e reto di kada siudadano mester ta ku nos ta usa e aña nobo pa ta e kaminda pa nos yega e aña nobo siguiente 2010，komo otro tipo di hende. Komo hende ku mundu por wak i respetá pasobra nos a prepará pa drenta Pais Kòrsou. Kada un di nos mester ta konsiente sufisiente pa usa e tempu ku tin pa bira hende ku ta gana konfiansa di tur hende pasobra nos ta digno di ta siudadano respetá. Nos promesa mester ta awe ku nos si no ta warda te desèmber 2009 pa tuma desishon pa por ta kla pa 1 di yanüari 2010.
Ta p’esei Fundashon Konsiente ta opiná ku kada siudadano su resolushon mester ta ku nos kada unu ta bai bira ménos dependiente di gobièrnu. Kada mayor mes ta karga su responsabilidat i sòru pa su yu bai skol. Sòru pa su yu tin transporte pa bai skol. Sòru pa kontrolá komportashon di su yu.
Medionan di komunikashon mester tuma e resolushon di ta e vehíkulo pa karga nos komunidat hiba nos futuro meresí. Ta medionan di komunikashon ta esnan ku por yuda sinseramente na edifiká nos hendenan i duna e guia ku mester.
Énfasis Fundashon Konsiente ta pone riba lidernan den tur nivel i klase. Lidernan sosial, lidernan komersial, lidernan bankario, lidernan polítiko i lidernan religioso. Tur mester duna ehèmpel tantu den públiko komo den nan bida privá pa esnan ku ta rekonosé nan komo lider por haña e guia pa benefisiá di e kosnan bon ku nos tin i pa konsientisá tur hende ku nan tin e responsabilidat tambe siendo siudadano legal den e komunidat aki.
Ponementu di responsabilidat den man di otro p.e. den man di gobièrnu ta un di e pió rasonnan pa no logra metanan personal segun Fundashon Konsiente. Ta p’esei Fundashon Konsiente ta enkurashá tur hende ku ta konsiente di ku nos kada unu meresé un mihó pais, pa nan karga nan mes responsabilidat, buska informashonnan ku tei pa tur hende i sa kiko ta e mihó kos ku por hasi pa abo mes hasi aña 2009 un aña ku ta trese e kosnan di mas mihó pa abo.
Fundashon Konsiente ta deseá tur hende un bon fin di aña i ku aña 2009 lo ta yená ku desishonnan konstruktivo individual ku ta bai forma e base fuerte pa nos pais ta esun ku kada un di nos meresé. Por haña mas informashon riba www.konsiente.com.
Komunikado 8 - 18 di sèptèmber 2008
Segun Fundashon Konsiente
Diversifikashon kultural ta un responsabilidat grandi
Kòrsou – “Siman di Kultura 2008, ta un oportunidat di oro pa benefisiá di e echo i konosementu ku Kòrsou semper tabata un komunidat multi étniko i multi kultural. Akseptando importansha di ta orguyoso ku ta nos ta nos, pasobra nos ta un komunidat diversifiká, ku tantu kombinashon di kultura; mester habri tambe serka esun konsiente e motivashon pa realmente benefisiá di e multi kultural ku Kòrsou ta. Konsiensia di e diversifikashon kultural serka nos tin un papel mas grandi ainda pasobra pa forma i karga un nashon nobo mester di hende ku tin un meta i vishon komun, maske ku nan tin diferente herensia kultural”.
Esei ta opinion di Fundashon Konsiente. E fundashon ku ta konsistí di siudadanonan konsiente, ta mira ‘Siman di Kultura 2008’ komo un paso importante pa huntu sigui òf kuminsá un rumbo konstruktivo pa futuro di Kòrsou.
“Ta ku akseptashon i komprenshon pa respetá nos kultura, ku tur su variedat; ta yega tambe na un desaroyo general mihó di Kòrsou” asina presidente di Fundashon Konsiente, Reyna Joe a bisa.
El a sigui bisa ku banda ku hopi hende ta usa Siman di Kultura pa selebrá kustumbernan manera nos kuminda, fishinan, arte, tradishon i folklor, tin tambe e akseptashon di ken nos ta, di kon nos ta manera nos ta, kon diverso nos ta i kiko realmente a hasi ku nos ta e hende i komunidat ku nos ta awe.
“Nos; i esaki ta nifiká tur pero tur gremio i klase den komunidat di Kòrsou, mester komprondé kon importante Siman di Kultura ta realmente pa formashon i stabilisashon di nos nashon. Tur hende, sea nan ke òf nò ta keda influensiá i toká pa selebrashon di nos mes i di nos kultura. Asta ora un hende skohe di no ke partisipá den Siman di Kultura”, segun Reyna Joe.
Fundashon Konsiente ta karga e speransa ku mas hende, despues di Siman di Kultura 2008, ku peso di e siman den nan mente, lo por skohe konsientemente pa hasi loke ta yuda nan mes i konsekuentemente tambe komunidat kompleto. Pasobra ta informashon i konosementu ta pone ku hende por reakshoná diferente di e manera ku semper el a reakshoná i aktua.
Basá riba informashonnan disponibel mester ta pues posibel ku mas hende ta konsiente susfisientemente pa hasi algu ku e multi kultural di Kòrsou pa asina ei den futuro i sigur den Siman di Kultura 2009, kontinuá ku un desaroyo konstruktivo i no ku mester bolbe kuminsá atrobe ku e proseso di komprondè importansha di kultura pa un pais.
Fundashon Konsiente ta invitá tur hende ku di bèrdat ke nifiká algu pa Kòrsou pa bishitá www.konsiente.com i partisipá na su enkuesta. Tur reakshon ta bonbini i por komuniká ku Fundashon Konsiente na konsiente@konsiente.com.
Komunikado 7 - 18 di ougùstùs 2008
Sin noshon masal nos no ta sa mihó
Segun spòt konsiente di Fundashon Konsiente
Willemstad – Fundashon Konsiente ta kontinuá e siman aki ku su proyekto di konsientisashon pa asina ei kontribuí na un mihó komunidat di Kòrsou, ku un spòt oudiovisual ku ta keda transmití un luna largu na Telekorsou i na TV11. Den e spòt ta duna un bista di kon influensianan internashonal ta influensiá nos tur na Kòrsou pero ku kada siudadano por tuma desishon pa su mes i pa su komunidat basá riba informashon ku ta disponibel pa tur hende. E spòt ta enfoká e kara multi kultural i multi rasial ku ta Kòrsou.
Fundashon Konsiente a lanta ofisialmente na yüni último komo reakshon di enkuentro di siudadanonan konsiente prekupá ku ke duna un man pa informá komunidat i kontribuí kaminda por, pa yega huntu na un mihó Kòrsou. A sinti un bashí grandi pasobra no tin realmente dunamentu di informashon pa asina ei duna i laga hendenan mes krea hèrmènt pa nan yuda nan kurpa pa asina ei eliminá òf sikiera suavisá situashonnan ménos positivo ku tin. Pa Fundashon Konsiente ta asina ku tur hende ku ke sa i ku ke realmente haña informashon konkreto, lo por tuma bon desishon pa benefisiá su mes.
E spòt konsiente ta pa Fundashon Konsiente un estímulo pa yega na un tópiko di kòmbersashon mas, kaminda hendenan ku ke Kòrsou bon por interkambiá di idea, formulá nan pensamentu riba e rumbo ku nos mester bai òf por bai i stimulá mas hende den nos komunidat pa nan ta konsiente. Importante ta pa tur hende komprondé ku ta kada un hende den komunidat por yuda pa nos tin i mantené un komunidat konsiente. Ke men ku ta e union den komunidat ta bai trese e benefisionan asina nesesario pa tur.
Loke ta interesante i bon pa opservá ta e kantidat di hende ku a aserká Fundashon Konsiente ku informashon i desishon pa nan duna un man den proyektonan pendiente di Fundashon Konsiente.
E próksimo proyekto di Fundashon Konsiente ta di bishitá barionan kaminda diferente persona lo duna informashon importante pa kontribuí na konsientisashon di komunidat i espesialmente pa esnan interesá sa realmente kiko ta pasando internashonalmente i ku ta influensiá nos tambe. A haña tambe algun empresa ku ta duna premionan di balor pa rifa bou di hendenan ku partisipá na e enkuentronan konsiente.
Por haña mas informashon riba meta i intenshonnan di Fundashon Konsiente na www.konsiente.com. Pa komuniká ku Fundashon Konsiente por manda un e-mail na konsiente@konsiente.com.
Komunikado 6 - 28 di yüli 2008
Ku un granito den e nesesidat real na Kòrsou
Fundashon Konsiente satisfecho di por duna hóbennan un man
Willemstad – Fundashon Konsiente a klousurá djadumingu 27 di yüli 12’or di anochi e siman di Reto Eskolar Konsiente 2008 i awor ta bai evaluá e aplikashonnan. Den siman ku a kaba a duna oportunidat na hóbennan ku fondonan limitá, di entre 15 i 25 aña, ku ta bai sea un HAVO/VWO, IFE òf UNA pa nan a apliká pa haña un sosten sea finansiero òf material pa nan skol, bou di kondishon ku nan ta bira boluntario pa un aña pa sostené proyektonan di Fundashon Konsiente.
A haña masha hopi aplikashon di kua mas o ménos sinkuenta ta válido, segun regla i kondishonnan stipulá pa Fundashon Konsiente, pa pasa den e komishon di evaluashon. Djamars dia 29 di yüli ta papia personalmente ku esnan ku a bin na remarke pa keda konsiderá i dependiendo di kon e kombersashon bai ta evaluá si por yuda e studiante spesífiko aki. Djabièrnè dia 1 di ougùstùs 2008 ta informá tur esnan ku keda aprobá si nan ta haña e sosten di Fundashon Konsiente si òf no. Tur komunikashon ku esnan ku apliká ta bai solamente via di e-mail i tur hende ku a apliká ta haña un e-mail pa bisanan si nan ta haña e sosten òf no.
Loke tabata notabel den henter e proseso di e Reto Eskolar Konsiente 2008 ta e echo ku hopi di nos hendenan ta aparentá di no ta dominá òf no ta konsiente di balor i oportunidatnan di Internèt. Mester realisá ku den aña 2008 no ta posibel ku un hóben studiante no tin akseso i/òf no sa kon traha ku Internèt. Te na ora ku hóbennan tin e akseso mes ta un realidat ku hopi no ta benefisiá di e oportunidat pasobra nan ta usando e kòmpiuter pa chèt i no pa amplia nan konosementu, loke por yuda nan den nan futuro i eventual karera ku nan skohe. I esaki atrobe ta keda reflehá den e manera defisiente di komuniká via di Internèt. Pa Fundashon Konsiente esaki ta pone ku mester traha riba konsientisashon di nos komunidat di benefisio i oportunidat ku uso di Internèt tin.
Fundashon Konsiente ta gradisí tur hende ku a tuma kontakto pa e konfiansa ku tin den Fundashon Konsiente i den su esfuerso pa duna un man konsiente na hóbennan ku ta futuro di Kòrsou.
Ta pidi na mes momentu konsiderashon ku debí na e fondonan limitá ku tin, ku no ta posibel pa yuda tur hóben, pero sin duda ta bai duna un man konsiente na esnan ku tin mas mester.
Pa mas informashon di Fundashon Konsiente por bai riba www.konsiente.com.
Komunikado 5 - 20 di yüli 2008
Fundashon Konsiente ta sostené e hóben ku ke bai dilanti
Ku Reto Eskolar Konsiente 2008
Willemstad – Fundashon Konsiente den kuadro di su trabounan di konsientisashon di komunidat tin e siman aki un Reto Eskolar Konsiente. Esaki ta un reto konsiente pa duna hóbennan ku ta na HAVO/VWO, IFE òf na UNA i ku ta sufisientemente konsiente pa sa kon importante baimentu di skol ta, un man pa traha riba nan futuro. E reto aki ta únikamente pa e hóben studiante ku tin fondonan limitá loke ta hasi difísil pa e por paga su skol i yega na loke mester pa skol. Pa Fundashon Konsiente sostené un hóben ta kontribuí na futuro di Kòrsou.
E siman aki ku ta di djaluna 21 di yüli te ku djadumingu awor 28 di yüli 2008, 24.00, por apliká riba www.konsiente.com pa bin na remarke pa haña sea aña eskolar 2008/2009 kompletamente pagá òf un lèptòp pa por hasi tareanan di skol manera mester ta. Tantu mayor òf representante legal di e hóben òf e hóben mes por apliká.
Presidente di Fundashon Konsiente Reyna Joe a splika ku tin informashon konkreto ku pa hopi mayor ku ta traha ta difísil pa sera e sèn pa paga skol òf pa kumpra algun kos ku ta hopi nesesario pa e yu ku ke bai skol hasi esaki tambe sin niun doló di kabes. “Ta bon konosí ku tin vários mayor ku ta traha duru hasi esfuerso pero debí na situashonnan aktual i ku ta komprendibel, tin e reto pa wak kon ta saka sòm pa por paga loke mester pa nan yu haña un bon formashon pa e por hasi un karera den futuro”.
“Sinembargo no ta djis skohe algun hóben i paga nan aña eskolar òf ta duna nan un lèptòp kompletamente grátis. Esnan ku apliká mester bai di akuerdo tambe pa bira parti di e grupo di sosten di Fundashon Konsiente. Lo tene kuenta debidamente ku skol i e responsabilidat di bai skol di e hóbennan ku keda skohé pa haña nan aña eskolar 2008/2009 pagá òf ku ta haña un lèptòp. Pero e hende konsiente sa tambe ku nada bon den bida no ta pòrnada i loke nos ta pidi bèk ta un kontribushon boluntario chikitu pero importante. I kiko mas mihó pa nos komunidat si nos tin hóbennan ku ta futuro di nos pais, ku tambe ta konsiente”.
Reyna Joe a splika ku no ta duna niun hende sèn kèsh den nan man. Fundashon Konsiente mes ta paga e skol(nan) direktamente.
Fundashon Konsiente ta konsistí di un grupo di siudadano konsiente i prekupá ku ke pa kos ta bon na Kòrsou. E fundashon a kuminsá ku su aktividatnan na kuminsamentu di yüni último na Kòrsou. Meta di e fundashon ta pa duna informashon riba desaroyonan ku ta tumando lugá rònt mundu i ku ta influensiá nos tambe, yuda esun ku ke pa e haña konosementu pa sa kiko e por hasi den e situashon aktual i hasi nos komunidat konsiente di nos realidat i bèrdatnan.
Fundashon Konsiente ta spera ku realmente Reto Eskolar Konsiente 2008 por kontribuí ku hóbennan ku di bèrdat mester di nan aña eskolar pagá òf ku mester di un lèptòp pasobra esaki por ta un alivio pa e mayor konsiente i un sosten den direkshon korekto pa e hóben studiante konsiente.
Por haña tur informashon pa por bin na remarke pa haña aña eskolar 2008/2009 pagá òf pa haña un lèptòp serka Fundashon Konsiente, na www.konsiente.com òf por yama di djaluna te ku djabièrnè entre 10’or i 14.00 na 767-9255, fax 747-4142 òf por manda un e-mail na konsiente@konsiente.com.
Komunikado 4 - 16 di yüni 2008
Konosementu ta nesesario pa biba konsiente
Segun Fundashon Konsiente
Willemstad - Fundashon Konsiente ta hasi uso di e oportunidat aki pa felisitá tur hóben ku a logra su meta di haña un diploma den e aña eskolar aki. E logro aki no ta únikamente un bon rason pa selebrashon pero e ta e reto pa e hóbennan aki kontinuá ku pasonan desididu pa mañan nan ta un hende mihó prepará, ku por kontribuí na nos komunidat i ku por tuma bon desishon pa su mes, su famia i su komunidat.
Opservando e kantidat di hóbennan ku a benefisiá di nos situashon di enseñansa mester duna apoyo tambe na e mayornan ku ke tuma e bon desishon pa nan manda nan yunan skol pa nan por traha riba nan futuro.
E apoyo na mayornan ta nesesario si realisá ku no ta muchanan mes ta tuma desishon pa nan bai skol. Sin mayornan konsiente i ku vishon, muchanan no ta haña e hèrmèntnan pa nan por bai skol. Te ainda tin lamentablemente den nos komunidat mayornan ku no ta komprondé ku ta nan ta responsabel pa logro eskolar di nan yu(nan). No solamente pa manda e yu skol pero tambe pa hasi ku e yu ta bira un hende responsabel ku disiplina ku por kumpli ku loke mester kumpli kuné den komunidat. Mayornan mester ta sufisientemente konsiente pa para duru ora mester, pa mustra e yunan ku tur hende tin kosnan ku mester tene kuenta kuné ora ta atendé ku otro hende. I mayornan mester komprondé ku si nan mes no tin e solushon ku nan mester buska yudansa pa yuda nan atendé korektamente ku na yunan.
Pensamentu di Fundashon Konsiente ta ku ta konosementu (ku ta haña e.o. via di skol i interes general) por krea rèspèt propio ora un hende ta komprondé kiko ta kiko. Ku rèspèt propio por logra ku un hende ta i por respetá hende rondó di dje. Respetando otro hende i ku rèspèt pa su mes, un hende por bira konsiente pa traha pa su mes, pa su famia, pa su komunidat pa asina ei mehorá kalidat di bida pa e mes i pa otronan. Sin hende konsiente nos lo tin un komunidat ku hendenan ku no sa kon biba, ni por konstruí un bida drechi i ku por hinka i mantené nan mes i/òf nos pais den un situashon di desbentaha.
Fundashon Konsiente ta apoyá mayornan pa nan komprondé ku nan mester kria hendenan pa futuro i no hendenan ku den futuro ke kosnan material pero no por traha pa yega na nada. I Fundashon Konsiente (sin niun pretenshon) ta spera ku su esfuerso pa duna informashon, pa motivá i pa konsientisá komunidat ta kontribuí pa kada mayor por eduká mihó yunan.
Pa mas informashon riba Fundashon Konsiente por bishitá www.konsiente.com òf por yama 767-9255, fax 747-4142, e-mail konsiente@konsiente.com.
Komunikado 3 - 16 di yüni 2008
Fundashon Konsiente ta puntra:
Kiko abo por duna pa Kòrsou ta bon?
Willemstad – ‘Kada individuo na Kòrsou sa kiko e mes por duna i kiko e por hasi pa asina ei Kòrsou ta bon pa su habitantenan’. Esei ta pensamentu di Fundashon Konsiente, kual organisashon a lanta resientemente pa sostené konsientisashon, dunando informashon nesesario na komunidat. E grupo di siudadanonan prekupá ku a uni pa lanta Fundashon Konsiente ta konsiderá ku komo ku tin masha hopi desaroyo ta tumando lugá i no tin informashon sufisiente pa esnan ku no nesesariamente tin akseso na informashon, lo mester duna un man na benefisio di nos komunidat.
‘Sin importá kual rumbo nos pais tuma ta nesesario pa nos tur produsí pa asina ekonomia bai bon. Sinembargo tin rason pa prekupá pa e manera ku nos mes hendenan ta atendé ku trabou i servisio individual konektá ku trabou. Den un pais manera di nos kaminda ku e úniko materia prima ta hende, ta nesesario pa nos hendenan sa esaki i ku tur hende ta bon pa por laga ekonomia kana. Sinembargo no ta posibel pa stimulá ekonomia ku hendenan ku no ta konsiente di kiko ta trabou’, asina presidente di Fundashon Konsiente, Reyna Joe a splika.
El a kontinuá bisando ku por opservá espesialmente serka hóbennan ku no ta sigui studia, ku hopi di nan ta bai traha, pero no ta ekipá ku e konosementu básiko fuerte pa por karga ekonomia di nos pais. ‘Kombiná esaki ku un falta di aktitut korekto pa ku trabou i e konosementu ku mester tin por komprondé ku mester duna atenshon konsiente na hóbennan ku awor ta drenta forsa laboral’ asina ta pensamentu di e fundashon.
‘Nos mester kuminsá purá pa konsientisá hóbennan for di na skol pa nan por komprondé ku tin trabou debidamente na Kòrsou pero ku e trabou tei pa esun ku ke traha i ku tin sierto konosementu i aktitut sosial/profeshonal korekto. For di na skol mester traha riba e hóbennan su manera di komportá profeshonal, nan vokabulario profeshonal i mester kria den nan un ambishon profeshonal’, asina presidente di Fundashon Konsiente Reyna Joe a sigui bisa.
‘Ku hóbennan ku no ta bon motivá i stimulá miéntras ku ta nan ta e forsa riba kua ekonomia mester drai, nos tin un desbentaha. E hóbennan mes tin desbentaha kada biaha ku pa mal eksperensia di nos empresarionan, preferá di tuma un stazjèr europeo den servisio na lugá di un graduado lokal ku no ta aparentá motivá’.
Pa Fundashon Konsiente ta nesesario tambe pa ta honesto ku nos hóbennan ku ta na skol i no laga nan kere ku nan nivel ta sufisiente pa nan drenta merkado laboral sin mas i sigur no riba e nivel ku nan ta aspirá. ‘I si hóbennan tin noshon i aktitut konsiente so nan por duna mas di nan mes pa nan mes i nan komunidat benefisiá’.
Próksimamente, ku apertura di aña eskolar nobo djis tras di porta, lo bin bèk riba e tópiko aki.
Tur esten Fundashon Konsiente ta gradisí tur hende ku entusiasmá ta ekspresando nan sosten na e intenshon pa konsientisá nos komunidat. Un gratitut tambe ta bai na e sostenedónan di Fundashon Konsiente. Lo hasi tur esfuerso pa inkluí tur hende ku ke duna un man den e proyektonan benidero di Fundashon Konsiente.
Pa mas informashon riba meta i intenshonnan di Fundashon Konsiente por bishitá www.konsiente.com, òf por komuniká via e-mail konsiente@konsiente.com.
Komunikado 2 - 8 di yüni 2008
“Pa kambia aktitut mester traha riba konsiensia”
Segun Fundashon Konsiente
Willemstad – ‘Un solushon sigur pa situashonnan desaroyando rondó di nos ta un kambio di aktitut serka kada hende individual’. Esei segun pensamentu di Fundashon Konsiente kual fundashon ta boga e.o. pa duna informashon korekto i konsiente na komunidat.
E fundashon ku a lanta resientemente pa konsientisá komunidat di Kòrsou, ta resultado di prekupashon di vários siudadano; espesialmente pa e falta di informashon korekto pa loke ta desaroyonan ku ta influensiando nos komunidat.
I un di e aspektonan sigur ku ta influensiá seriamente sin ku nos por kontrol'é, ta e oumento di preis di bari di krudo riba merkado internashonal. Loke nos por kontrolá ba kon nos mes ta hasi komo komunidat pa garantisá ku nos ta pasa ku ménos konsekuensia negativo posibel dor di e realidat aktual.
‘Un komunidat por sobreviví kualke reto basta ku tin e aktitut korekto serka su siudadanonan’, asina ta pensamentu di Fundashon Konsiente. Pero un hende por adaptá òf kambia su aktitut ora e sa kiko ta pasando i kiko e mes por hasi pa yuda su kurpa. Ta p’esei ta importante pa tur hende wak kiko ta positivo i kiko por ta solushon den kada kas di famia. Un akshon simpel i importante por ta ku famianan ta sinta huntu i palabrá kon ta bai atendé ku gastunan ku ta subiendo i ku no por skapa di dje. Si famianan tuma e aktitut kaba di ku ta huntu nan por solushoná kualke situashon ku presentá, anto nos por yega na kuminsamentu di un kambio di aktitut nesesario.
“Mester bisa ku aktitut no ta algu ku un hende por mira direktamente pero si por nota resultado di kambio di aktitut”, segun presidente di Fundashon Konsiente, Reyna Joe. E ta spera ku tur hende ta probechá di informashonnan ku tin disponibel i tambe di e.o. tepnan ku lo sigui tin riba www.konsiente.com.
Un punto masha importante ku Fundashon Konsiente ta aploudí ta e vários instansha i empresanan ku a kuminsá duna informashon na konsumidónan. “Tur ku di un forma òf otro ta duna informashon pa yuda hasi nos komunidat konsiente lo haña apoyo di Fundashon Konsiente,” asina Reyna Joe a bisa.
Fundashon Konsiente ta tambe habrí pa tur hende konsiente na Kòrsou ku ke sostené e fundashon. Por tuma kontakto ku Fundashon Konsiente na info@konsiente.com, na telefon 767-9255 òf na fax 747-4142. I riba www.konsiente.com ta bai keda publiká regularmente informashonnan balioso.
*Komunikado 1* - 2 di yüni 2008
Siudadanonan prekupá a uni den
Fundashon Konsiente
Pa duna man na konsientisashon general
Willemstad – Resientemente a lanta na Kòrsou Fundashon Konsiente un fundashon den kua siudadanonan prekupá pa falta di sufisiente informashon balansá a bini huntu.
Meta di e fundashon ta pa bai duna informashon nesesario na komunidat; konsientisá di desaroyonan ku ta tumando lugá di kua nos por hasi algu n’e i kual nos no por hasi nada n’e i konsientisá siudadanonan pa nan mes karga responsabilidat pa yega na un mihó Kòrsou.
E fundashon ta bai realisá su meta dor di organisá diferente proyekto di konsientisashon na kua komunidat por partisipá. E promé proyekto ku ta bai kuminsá den luna di yüni 2008 ta titulá: ‘Mi tambe ke sa!’
Proyekto ‘Mi tambe ke sa!’ ta bai enfoká riba konsientisashon di ko-siudadanonan pa nos tur haña sa i komprondé desaroyonan ku tin lokal i internashonal i pa asina ei kada hende individual tuma e mihó desishon pa su mes. Komo individuonan konsiente nos kada un por yega na e kolektividat konstruktivo pa benefisiá tur hende den nos komunidat.
Fundashon Konsiente ta sali for di e konosementu ku tin masha hopi hende ku no tin akseso na informashon real di kiko ta pasando den nos komunidat i ku futuro di nos pais. Pero ku òf sin informashon hopi hende ta sinti ku situashon ta birando mas difísil debí na e.o. oumento di preis en general i impakto direkto di desaroyonan internashonal riba mundu i pa e motibu ei tambe riba nos isla.
‘Nos ta sinti un skarsedat di informashon sano i balansá pa tur hende por tuma bon desishon personal’, asina presidente di Fundashon Konsiente, Reyna Joe a bisa.
‘Hasiendo uso di konosementu i eksperensia di hendenan ku sa den nos komunidat, nos lo bai den barionan ku nos promé proyekto di konsientisashon real pa nos komo siudadano kontribuí na e komunidat kaminda hendenan ta mas konsiente. Niun hende no por konfundibu si bo mes sa’, asina el a sigui bisa.
Fundashon Konsiente su direktiva ta konsistí di presidente Reyna Joe, vise presidente i tesorero Gabriël ‘Boy’ Magdalena, sekretaria ir. Tamara Croes i komisarionan ing. Edwin Constancia i Charine Martina-Wal. Komo konseheronan fiho ta afiliá tambe na e fundashon siudadanonan Florida Daflaar, Nohraya Godfried i dr. Justine Heyden. Fundashon Konsiente ta konta tambe ku algun otro konsehero fiho, kendenan ta preferá di koperá i kontribuí den anonimidat.
Fundashon Konsiente ta konta ku mas siudadano konsiente lo komprondé e mensahe i duna nan kontribushon, sea personalmente, ku ideanan, sugerensianan, donashonnan i tambe den kualke forma ku lo benefisiá futuro di Kòrsou.
Por komuniká ku Fundashon Konsiente na telefòn 767-9255, 665-2785, faks 747-4142, e-mail konsiente@konsiente.com. Tambe por reakshoná i haña mas informashon riba www.konsiente.com.
Bo tin un reakshon konsiente?
Komuniká ku Fundashon Konsiente
na konsiente@konsiente.com